عودة بعد انقطاع

تم فتح باب المدونة :D

قفلتها لمدة كبيره يمكن كانت نفسى مسدوده

يمكن كانت فى حاجات مضايقانى

لكن دلوقتى عندى احساس غريب بأنى عايزه اكتب

رغم ان ما بقاش عندى وقت فاضى كتير زى زمان

بس فعلا محتاجه اكتب

وفى ناس كتير اوووى وحشانى

يارب يكونوا بخير

قررت اكتب

اقيموا الافراح والليالى الملاح :)

.

.

.

مغلــــــــــــــــــــــــــــــــــق

.
.
.

تاج وتاج وتاج

اول مره يجيلى تاج ومش اعتقد ان حيجى غيره :p

وبعد اصرار والحاح من الجماهير

قررت الاجابه

نبدأ بسم الله

=-=-=-=-=-=-=-=
قوانين الواجب

1- اذكر اسم من طلب منك حل الواجب ؟

سيمبا صاحب مدونة سيمبا اخويا الصغنن :p

-=-=-=-=-=
2-اذكر القوانين المتعلقه بهذا الواجب ؟

اى دونت نو هههههههه

6 اسرار قد لا يكتشفها من يقابلك لاول مره ؟

1- بتقمص بسرعه جدا ههههههههه بس برضه بتصالح بسهوله ومن غير ماحد يصالحنىساعات هههههه

2- ارتباطى الزايد بالناس رعم انى فى اوقات كتير بحاول اظهر العكس

:D

3- بركز اووى مع الناس خصوصا اللى بقابلهم لاول مره لحد ما اكتشف شخصيتهم

4- فضوليه فضوليه فضوليه هههههههههههههههههههههههههه بس بحاول اقلل والله :D

5- عصبيه جدااااااااااااا بس دايما عصبيتى بتضرنى اكتر ما بتضر اللى حواليا وبتكون داخليه مش خارجيه

6- بحب الناس تعاملنى على انى طفله فى وقت الهزار واللعب لكن وقت الجد انا احسن من مليون راجل تبعا تبعا هههههههههههههههههههههههههههه :p

-=-=-=-=-=-=-=
4- حول هذا الواجب الى سته مدونبن واذكر روابط مدوناتهم ؟

* سيمبا صاحب مدونة سيمباوى مش عجبانى الاسرار اللى كتبها :P

رحيق صاحبة مدونة اواخر الشتا

* ليالي : صاحبة مدونه إليك يا عمري
* وردة مصر : صاحبة مدونة نغــــــم

=-=-=-=-=-=-=-=
5- ترك تعليق فى مدونات من ارسلت اليهم الواجب ليعلموا به ؟

كله حيوصل ان شاء الله :D

الحب الغير مشروط

بحبك علشانك وبس

بحبك من غير مصلحة ولا هدف

بحبك وبخاف عليك

مش عايزه منك حاجه

ولا مستنية منك شئ

بحبك من غير لاشرط ولا قيد

بحبك وبس

بحبك فى الله

حكمة كنت فاكرة انها انقرضت رغم انى كنت مؤمنة بيها جدا

لكن كان نادرا لما كنت بلاقيها فى حد من البشر

وشفت الحكمة دى قدام عينى ناس بتحب بعض من غير هدف ولا مصلحه

رغم اختلاف الثقافات واختلاف الطبقات

الا انهم اجتمعوا على الحب الغير مشروط

شفت ده فى دار نقاهة الحرية فى وادى النطرون لعلاج واعادة تأهيل مرضى الادمان

بدأنا برنامجنا هناك بجلسة

N A

وفي بداية الجلسه بيسأل المشرف على الجروب

مين مبطل بقاله فتره معينه مثلا شهر

واللى مبطل بقاله مدة معينه زمايلة يحتفلوا معاه احتفال مش عادى ويغنوا ليه

ويفرحوا ليه من قلبهم بجد

شفت الفرحه دى فى عنيهم وفى تصرفاتهم

وكان من وسط الناس

واحد مبطل بقاله 9 شهور

وتانى مبطل بقاله سنه ونص ما شاء الله

وفى اللى كان اول مره يحضر

وبعد كده ابتدى كل واحد يعبر عن مشاعره

خاصه لو مشاعر سلبيه لازم يخرجها من جواه عشان ما ينفذهاش على ارض الواقع

مشاعر احنا شخصيا ما نقدرش نتكلم عنها

لان الناس دى قدرت انها تتصالح مع نفسها

قدرت تشوف نفسها بجد من جوه اووى

قدرت تتغلب على مشاكل ضخمه اووى فى حياتها

استمتعت جدا بسماع كلامهم ومشاعرهم الصادقه جدا

رغم ان فى اوقات كنت بزعل وبتضايق

بس من اهم شروط حضورنا اننا نحافظ على مشاعرنا سواء فرح حزن شفقه

عشان ممكن نظره واحده من عنينا تأثر تأثير سلبى على المريض وتخليه يتنكس

وخصوصا ان احنا لسه غير مدربين بشكل كامل على التعامل معاهم واستيعابهم

وصلنا كلنا لحالة من الانبهار والاستغراب فى نفس الوقت من الناس دى

ومدى صراحتهم وشجاعتهم

وقوتهم على التعبير عن نفسهم

ورغم ان فى بعض الناس كانت متضايقه من وجودنا لانهم كانوا حاسين

انهم مش عارفين يعبروا عن نفسهم كويس فى وجود اغراب

بس احنا ما اتضايقناش وقدرنا مشاعرهم جدا

وانتهت جلسة

N A

وبعدها بدأنا نتفرج على المكان وكان وقت غروب الشمس

وكان المنظر يجنن سبحان الله

والمكان تحفه سواء الملعب سواء الجناين

بجد ما شاء الله المكان حلو جدا

وبعدها كان فى حفلة تخرج لعشره من المرضى

كانت حفله فوق الروعه

قد ايه حمستنا اننا نشتغل اكتر

وندى اكتر

قد ايه غيرت فينا كتير

ودى ححكيلكوا عنها ان شاء الله المره الجايه :D